Dakop ang isa ka parking boy matapos madakpan kasunod sang pagpangawat sang cellphone sang duha ka mga nursing students nga nagakaon sa isa ka restaurant sa Dalan Lacson, Barangay Mandalagan, Bacolod City pasado ala-1:00 kahapon sang hapon.
Ang suspetsado ang ginkilala nga si Ramuel Lopez, 42 anyos, single, tumandok sa Barangay Alimango, Escalante City kag nagaserbe nga parking boy sa nasambitan nga area.
Kahapon, samtang nagakaon ang grupo sang mga nursing student gikan sa isa ka pribado nga kolehiyo sa ciudad sang Bacolod, temporaryo nga ginbiyaan sang duha ka lalaki nga estudyante sa lamesa ang ila nga mga cellphone agud mag-CR.
Matapos makakita sang tyansa, gilayon nga gintaban sang suspetsado ang cellphone kag nagdalagan padulong sa sur nga dereksyon.
Gilayon man ini nga ginlagas sang mga biktima, nga naghingyo nga indi na lamang paghingadlan, samtang sila ang naghingyo man sang bulig sa iban pa agud malagas ang suspetsado.
Isa ka motorista ang naglagas kay Lopez kag ini ang ginbanggaan gani nahimo nga madakpan ang suspetsado.
Ini ang ginhunong sa Bacolod City Police Station 3, kag sa karun ginahulat pa kun magapasaka sang kaso ang mga biktima batok sa nasambitan nga kawatan.
