Ginbawian sang kabuhi ang 35 anyos nga lalaki matapos maglumpat sa roro vessel nga bag-o lang nakabiya sa BREDCO port kahapon sang hapon.
Suno sa Commander sang Philippine Coast Guard Station Northern Negros Occidental nga si Commander Joe Luviz Mercurio, ang biktima ang ginkilala kay Joel Batallones Calubia, kag residente sa San Dionisio, Iloilo.
Suno sa Coast Guard commander, nakabaton sang report gikan sa LCT Lady of the Philippine Nabstar nga Roll On Roll Off vessel ang mga katapo sang PCG ala-1:55 sang hapon nga may naglumpat gikan sa barko samtang sila ang nagamanuevre agud kuntani maglayag na padulong sa Iloilo.
Gilayon naman nga nagpatigayon sang search and rescue operation ang mga katapo sang PCG kag nagkoordinar sa City Disaster Risk Reduction and Management Office (CDRRMO) sa syudad sang Bacolod agud masakay sa ambulansya kag madala sa balay bululngan ang biktima.
Apang ang biktima ang gindeklarar nga dead on arrival.
Suno sa upod sini, nagasuprer sang nervous breakdown ang biktima nga rasun agud ini ang maglumpat sa baybay.
