Patay ang pasahero sang tricycle nga aksidente nga nabungguan sang salakyan sa national highway, Sitio Tapol, Barangay Salong, Kabankalan City, Negros Occidental kaina sang hapon, Nobyembre 28, 2025.
Sa interview sang Bombo Radyo Bacolod kay Police Lt Col. Roberto Indiape, hepe sang Kabankalan City Police Office, ang vehicle 1 nga isa ka traysikol nga ginamaneho ni Glenn Garilles, 27 anyos, single kag residente sang Purok Bandihan, Brgy. Salong, Kabankalan City kag ang Vehicle 3 nga isa ka Mitsubishi Adventure nga ginamaneho ni Oscar Sumugat, 71 anyos kag residente sang Brgy. Magballo, Kabankalan City ang nagabiyahe sang pareho nga direksyon.
Apang pag-abot sa ginluntaran sang aksidente nag-overtake ang tricycle kag ang Mitsubishi Adventure sa wala matumod nga salakyan.
Apang ang tricycle ang nakabunggo sa sugata nga vehicle 2 nga isa ka Isuzu Elf aluminum van nga ginamaneho ni Amando Guanzon, 53 anyos kag residente sang Brgy. Cabug, Bacolod City nga padulong sa Kabankalan City Proper halin sa Barangay Tabugon.
Bangod sa impact, naglabog ang pasahero sang traysikol kag nahulog sa sementado nga dalan nga aksidente naman nga nabungguan sang nagasunod nga salakyan.
Ginkilala ang pasahero sang traysikol nga si Ernesto Araneta, 41 anyos, kasado kag Purok Macawiwili, Brgy. Salong, Kabankalan City.
Ang biktima ang gindala pa sa Kabankalan District Hospital para sa nagakaigo nga pagbulong apang bangod sa patal nga samad bangod sa impact sang pagbunggo, ini ang ginbawian sang kabuhi.
Ang mga salakyan nga imbulbado sa aksidente ang yara sa Kabankalan City Police Station for proper disposition.
Suno kay Indiape, may yara naman sang initial nga pag-estoryhanay ang pamilya sang napatay kag driver sang salakyan.
