Gindeklarar nga dead on arrival sa ospital ang isa ka lalaki matapos nga gintiro sa reclamation area sa ciudad sang Bacolod, kahapon, Disyembre 16.
Ginkilala ang biktima kay Joedan Rafols sang Brgy. 31, Bacolod City.
Ginapahayag sang nakasaksi nga nagasakay sa tricycle ang biktima sang ini ang gintiro sang ginabanta duha ka mga wala makilal-an nga mga suspetsado.
Suno sa witness ginalagas sang mga wala makilal-an nga nakasakay sa motorsiklo ang tricycle nga ginasakyan sang biktima.
Ginpahayag nga tatlo ka lupok ang nabatian sa lugar samtang nakabunggo man ang tricycle nga ginasakyan sang biktima matapos nga naglumpat ang driver sa ginamaneho nga tricycle.
Suno kay Alyas Boy, nakita sini nga may igo na sang bala ang biktima paglabay sa Doromal restaurant kag madasig man ang pagpadalagan sang driver sa tricycle nga daw kaangay may nagalagas sa ila kun sa diin nakabunggo ang tricycle.
Nagasakay sa motorsiklo nga NMAX nga nagaduag sang itom ang mga suspek kun sa diin nagasuksok sang bonnet ang gun man samtang ang driver ang nakahelmet.
Sa karun padayon pa ang imbestigasyon sa shooting incident agud matumod ang motibo sa krimen.
