Duha ka mga miyembro sang Kingdom of Jesus Christ (KOJC) ang napatay matapos macardiac arrest sa pagsulong sang masobra dos mil nga mga kapulisan agud magserbe sang warrant of arrest kay Pastor Apollo Quiboloy.
Sa interview sang Bombo Radyo Bacolod kay Jeffrey Celiz, National Task Force to Enc Local Communist Armed Conflict (NTF-ELCAC) Consultant kag political commentator sa media platform ni Quiboloy, ini ang yara mismo sa 11 ektarya nga pasilidad sang ginpalibotan sang mga suldado.
Nangin mainit naman ang komprontasyon sa tunga sang nagabalabag nga mga miyembro sang simbahan kag mga kapulisan nga nakafull battle gear.
Suno diri, apisar nga una na nga nagpahayag si former President Rodrigo Duterte nga pahanugutan lamang ang mga kapulisan, indi mabasol ang kaakig sang mga KOJC members ilabi na nga sila ang kaangay nga ginagarit-garit ni Davao Police Regional Office Director Police Brig Gen Nicolas Torre III, samtang ang raid ang gindungan pa sa devotional prayer sang religious group.
Suno kay Celiz, maka-apat na ka beses nga ginlibot sang mga kapulisan ang tanan nga area kag ginpagwa ang mga miyembro apang wala man nila makita si KOJC founder Pastor Apollo Quiboloy.
Nagapati si Celiz nga tuyo gid sang mga kapulisan nga ma-occupy ang lugar, apisar nga ini ang ginadumilian sang layi may kaangtanan sa pagserbe sang warrant of arrest.
Suno diri, may limit nga oras sa pagpatigayon sang search, dugang pa nga ang ginsulod ang isa ka religious institution.
Sa komprontasyon sa mga KOJC members, apisar nga naghatag sang warning, sa paghaboy sang tear gas, duha ang napatay bangod sa cardiac arrest samtang may pito naman nga nalipungan, kag may duha nga gikan sa engineering department nga nagapabilin nga missing.
Ang mga kapulisan ang pilit nga nagapanindugan nga may secret bunker nga ginapanaguan ang pastor, apang suno kay Celiz, nalibot na nila ang tanan kag wala gid sang may natukiban nga bunker entry.
