BACOLOD CITY-Naghingyo na sang pasaylo ang pastor sang River of Life Ministries sa Brgy. Tabao, Valladolid nga nagdunot sang imahen sang Santo Niño kun sa diin ang iya nga video ang nagviral sa social media kag nag-agum sang pagpakamalaot nagikan sa mga netizens.
Ang video ang ginkuha sang mga kaupod ni Christopher Gayoba sa relihiyon kag gin-upload sa YouTube.
Diri ginpahayag sang pastor nga demonyo si Santo Niño kag nagadala sa mga nagatuo diri sa impyerno.
Kaina sang hapon, si Pastor Christopher Gayoba ang naghingyo sang pasaylo sa mga Katoliko kag Aglipay paagi sa video nga ginpost sa Facebook.
Pastor nga naglapak sang imahen ni Sto. Niño nagpangayo na sang pasaylo
Aminado si Gayoba nga may ginguba ini nga parte sang pagtuo sang kalabanan gani nagapangayo ini sang kapatawaran sa mga na-insulto kag nasakitan sa iya nga gin-ubra.
Samtang, aminado man si Father Diosdado Latoza sang St. John Paul II Parish sa Valladolid nga indi insakto ang gin-ubra ni Pastor Gayoba apang naghingyo ini sa publiko nga indi na pagpadalman ang insidente bangud nagakaapektuhan ang pamilya kag ginikanan ni Gayoba.
Ang nagviral nga video ang nag-agum sang mga indi maayo nga mga comments halin sa mga netizens kag suno kay Father Latoza, nagalalain ang iloy sang pastor nga isa man ka deboto sang nasambit nga parish.
Suno sa iya, kinahanglan nga sundon ang prinsipyo sang Santo Papa tuhoy sa kalinong kag paghigugma gani nagahingyo ini nga indi na magsagad komento sang negatibo bangud naluoy ini sa iloy ni Gayoba.
Ginakabig man nga maayo nga oportunidad ni Father Latoza ang natabo bangud paagi diri, napukaw ang Catholic sensitivity sang mga pumuluyo ilabi na sang mga kabataan.
Ginakasubo man ni Father Agustine Hinayan sang Diocese of Bacolod ang balita nga gindunot ang imahe sang Santo Niño bangud suno sa iya, ginakabig ini nga sagrado sang mga Katoliko ilabi na kun mabinditahan.
Ginpaathag man sini nga wala ini ginasimba sang mga deboto kundi ginakabig nga alagyan agud makapalapit ang mga ini sa Ginoo.
Suno sa iya, kun wala nagakomporme sa ini nga pagpati, kuntani respetuhon nalang bangud wala man ini nagasupak sang morals sang gobyerno.
