Patay ang duha ka indibidwal samtang duha naman ang pilason matapos makabunggo ang ila ginasakyan nga ambulansya sa poste sang solar light sa Purok Biante, Barangay Recreo, banwa sang Pontevedra, Negros Occidental, pasado alas-3:00 sang hapon, Abril 8.
Ginkilala ang mga napatay nga sanday Dalia Vertusio, 70 anyos nga amo ang pasyente nga sakay sang ambulansya, residente sang Brgy. 3 Poblacion, Isabela kag ang ambulance crew nga si Peter Aguarin, 30 anyos, residente sang Barangay Sebucauan, Isabela.
Samtang ang mga pilason naman amo sanday Stephen Penionial, residente kag Punong Barangay sang Brgy. Sebucauan nga amo man ang driver sang ambulance, kag ang himata sang pasyente nga si Maria Gina Mogar, 30 anyos.
Sa interview sang Bombo Radyo Bacolod kay Police Captain Darryl Kuhutan, hepe sang Pontevedra Municipal Police Station, padulong ang ambulansya sa syudad sang Bacolod agud idul-ong ang nasambit nga pasyente.
Sa inisyal nga imbestigasyon, may yara sang ginalikawan nga tricycle ang ambulansya apang sa paglikaw sini, naalang-alang kag nadulaan sang kontrol gani nagliko sa natuo nga direksyon nga nagtuga sang pagkabunggo sa isa ka streetlight.
Gindeklarar nga dead on arrival ang pasyente kag ang isa ka crew sang ambulansya.
