BACOLOD CITY — Nagalaom ang isa ka amay nga mahatagan sang hustisya ang kamatayon sang iya anak matapos ginaalegar ginbalibaran nga iadmit sa Corazon Locsin Montelibano Memorial Regional Hospital.
Si Manuel Mercano sang Barangay Sum-ag, Bacolod City ang nagdangop sa Bombo Radyo Bacolod agud ireklamo ang nadangatan sang iya anak.
Marso 14 sang gindala sang amay ang anak nga si Neil, 26-anyos, sa CLMMRH bangud isa na ini ka semana nga indi makakaon sang maayo.
Nakit-an sang amay nga nagahabok ang liog ni Neil.
Suno sa wala pa nakilal-an nga doktor, wala sang masakit si Neil gani sila ang ginpapauli.
Pahayag sang doktor, wala sila nagabaton sang pasyente nga wala nagakaon kag nagaligid nalang.
Marso 15, naglala ang ginabatyag ni Neil gani nagbalik sa CLMMRH ang mag-amay sang Marso 16.
Suno sa amay, gin-akigan sila sang pareho man nga doktor bangud para sa iya, ginpamilit nanday Mercano nga may yara sang balatian si Neil.
Nag-isyu sang discharge order ang doktor apang wala nagpauli sanday Mercano.
Suno sa amay, ginalabay-labayan lang sila sang doktor tubtub nga sila ang gintabog sang Marso 17.
Nagpangakig ang amay rason nga gin-admit sila sang Marso 17 sang gab-i bangud nakit-an nga nagapula ang tutunlan ni Neil.
Marso 18, alas 3:00 sang kaagahon, nagtaliwan si Neil.
Sa provisional death certificate, ang pasyente ang napatay bangud sa acute respiratory failure.
