Dismayado ang iloy sang pasyente nga nakaadmit sa Corazon Locsin Montelibano Memorial Regional Hospital (CLMMRH) matapos nga wala sini nakita ang anak antes ini magtaliwan.
Sa interview sang Bombo Radyo Bacolod kay Roselyn Bicera, residente sang Barangay Kapitan Ramon, Silay City, ang iya anak nga si Richmond, 26-anyos ang nagtaliwan sa CLMMRH kagab-i.
Suno sa iloy, sang Sabado gin-admit ang anak niya agud matakdan sang tubo bangud madamo sang tubig sa likod sini.
Suno pa diri, wala siya ginpasulod bangud wala na ginatugutan ang mga watcher sa ospital kundi ginkuhaan lamang siya sang numero agud tawgan lang.
Apang natingala man ini nga wala na siya gintawgan kag sang gintawag ini kahapon, ginhatagan siya sang papel agud pirmahan nga nagapasugot ini nga tubuhan sa baba ang pasyente bangud indi na ini maayo makaginhawa.
Wala siya nagpirma bangud wala pa ini nakalisensya sa asawa sang pasyente apang samtang nagapanawag ini, ginpahibalo siya nga ginbawian na sang kabuhi ang pasyente.
Personal naman nga ginalantaw sang iloy nga nasup-ay ang anak sini gani ginbawian sang kabuhi matapos makita sini ang mga diaper, bisti kag pagkaon nga wala magamit.
Nagasakit ang buot sang iloy nga Bicera bangud wala gid sini naatipan ang anak antes ginbawian sang kabuhi.
Wala man ini nagpasugot nga icremate ang bangkay sang anak niya bangud nagapati ini nga wala natapikan sang coronavirus ang iya bata.
Ginpahayag man ni Bicera nga wala ginpasugtan nga makuha nila ang bangkay sang anak niya sa morgue sang ospital bangud hulaton pa ang resulta sang swab test sini, lain sa gin-abiso sang doctor nga mahimo nila makuha sa punerarya.
Ginalauman sini nga maggwa na ang resulta sang swab test kag dako ang pagpati sini nga negatibo ang pasyente sa virus.
Madumduman nga ginsapupo sang Barangay 18 ang mga watcher sa ospital nga wala na ginpasulod bangud sa pagsulundan nga indi makasulod agud malikawan ang pagdamo sang community transmission sang COVID-19.
