Nagdangat na sa 677 ang positibo nga kaso sang COVID-19 sa probinsya sang Negros Occidental, santo sa pinakaulihi nga data ang ginpagwa sang Department of Health Region 6.
Sa data nga ginpagwa kahapon Agosto 10, 2020, may yara sang nagdugang nga 11 ka mga local transmissions.
Samtang sa sulod naman sang lima adlaw humalin sang Agosto 6 tubtob Agosto 10, nagdangat na sa 16 ang kabug-usan nga narecord nga local cases sa probinsya.
Nagapabilin naman sa duha ang nagtaliwan bangud sa COVID-19 sa probinsya.
Ini ang ginlakipan sang isa ka boat captain nga nagikan sa San Carlos City, Negros Occidental kag isa nga 62 anyos nga amay nga residente sang Silay City nga nalatnan sang anak sini nga nurse sa syudad sang Bacolod.
Samtang, nagapabilin man sa quarantine facility ang nurse kag gindala man ang iloy sini bangud nagpositibo man sa balatian.
Sa pihak nga bahin, nagpagwa naman sang statement subong nga adlaw ang Western Visayas Medical Center (WVMC) Integrated Laboratory sa syudad sang Iloilo kalakip na ang Sub National Laboratory matapos nagpositibo sa Covid-19 ang isa ka medical technologist.
Sa statement sang WVMC, ginpaidalum sa decontamination ang laboratoryo.
Bangud sini, temporaryo nga indi magbaton ang pasilidad sang swab specimen.
Ginpasiguro sang WVMC nga maga resume ang ila operation sa madali nga panahon sa tion nga matapos na ang decontamination kag hilway na ang ila personnel sa pagserbisyo.
