Nakilal-an na ang patay nga lalaki nga nasapwan sa higad sang dalan sa Hacienda Othelia, Barangay Efigenio Lizares, Talisay City sang Setyembre 15.
Sa interview sang Bombo Radyo Bacolod kay Police Major Wilfredo Benoman, Deputy Chief of Police sang Talisay City Police Station, ang biktima ang ginkilala nga si Richard Fejedero, 56 anyos, residente sa Zone 4, Barangay Payao sa banwa sang Binalbagan.
Ang biktima ang positibo nga ginkilala sang iya bayaw nga si Mary Jane Fejedero, 47 anyos matapos nga ini ang nagpadulong sa punerarya.
Suno kay Benoman, ginpahayag sang bayaw nga may-ara sang deperensya sa paminsaron ang biktima kag ini ang makapila naman nga nagakadula.
Dugang pa sini nga may tion na nga nakadangat sa banwa sang Salvador Benedicto kag Sipalay ang biktima.
Sa karun, ginahulat pa sang Talisay City Police Station ang resulta sang postmortem examination sang Talisay City Health Office, agud matumod kun ano ang kabangdanan sa mga pilas nga nakita sa ulo sang biktima.
