Lunsay nagnegatibo sa coronavirus ang 52 ka mga persona sa banwa sang La Castellana lakip na ang second swab test ni Patient No. 2.
Madumduman nga gilayon nga ginkuhaan sang swab sample para sa real-time polymerase chain reaction (RT-PCR) test ang mga persona nga nakapalapit kay Patient No. 2 nga isa ka 43-anyos nga driver nagikan sa Pavia, Iloilo kag residente sang Barangay Nato, La Castellana.
Sa interview sang Bombo Radyo Bacolod kay La Castellana Mayor Rhumyla Nicor-Mangilimutan, ginpahayag sini nga ipaidalom pa nila sa 3rd swab test si Patient No. 2 agud nga makumpirmar nga negatibo na ini sa coronavirus.
Natalana naman nga magsapol ang inter-agency task force against coronavirus sa La Castellana agud hambalan ang pagbatak sang enhanced community quarantine (ECQ) sa ila nga banwa ilabi na sa Barangay Nato.
Nahibaluan nga ang probinsya sang Negros Occidental ang yara na sa general community quarantine apang naka-status quo naman ang ECQ sa La Castellana.
Suno kay Mangilimutan, ila paga-istoryahan subong nga adlaw kun maga-upod na sila sa ginapatuman nga GCQ sa probinsya bwas, Mayo 6 kag kun ano pa nga mga tikang ang ila paga-obrahon agud malikawan ang paglapta sang balatian.
