Nakaagom sang minor injury ang driver sang pribado nga salakyan nga nakabunggo sa nagapark nga patrol car sang Bacolod Police Station 5 sa Barangay Granada, ciudad sang Bacolod kahapon sang aga, Hunyo 16, 2024.
Sa interview sang Bombo Radyo Bacolod kay Police Captain Portia Nillosan, station commander sang Bacolod Police Station 5, bag-o lamang nagparking ang patrol car bangud magapanyaga kuntani ang driver sang hinali lang nga nagbunggo diri ang itom nga Toyota Vios nga nagikan sa Barangay Alangilan.
Suno kay Nillosan, nagkupos ang pangulihi nga royda sa nawala nga bahin sang patrol car samtang nawasak naman ang bumper sang kotse.
Suno sa station commander, napiyungan ang driver sang kotse samtang nagamaneho gani nagbunggo ini sa patrol car.
Ginpahayag man sini nga mahimo man pasakaan sang nagakaigo nga kaso ang driver sang pribado nga salakyan bangud sa aksidente.
