Plastado na ang venues kun diin patigayonon ang pay out para sa ayuda nga ipanagtag sa mga tricycle drivers sa ciudad sang Bacolod.
Suno kay Bacolod City Mayor Greg Gasataya, ma-umpisa na bwas, Abril 8 tubtob Abril 10 ang releasing sang financial assistance para sa mga validated nga tricycle drivers sa ciudad sang Bacolod.
Suno diri, ang apat ka pay out centers amo sa Bacolod City College sa brgy. Taculing; Bacolod City National High School sa brgy. Taculing; SM City Bacolod kag Ayala Capitol Central Mall Bacolod.
Ang gin-aprubahan sang Department of Social Welfare and Development (DSWD) nga makabaton sang P5,000 nga ayuda nagdangat sa 9,617 ka tricycle drivers.
Suno kay Gasataya tatlo ka adlaw ang gintalana para sa pay out agud indi maggutok kag padayon ang byahe sa dalanon.
Gin-contact ang mga beneficiaries kun san-o ang ila schedule kag kun diin sila nga pay out centers mapadulong.
Dapat magdala sila sang valid nga lisensya kag duha ka photocopy sang ila lisensya nga may tatlo ka perma kag dapat ang driver gid ang makuha sang assistance kun able lang man ini.
Samtang, ginalauman naman ni Gasataya nga may yara sang mga magareklamo amo nga may ihamtang nga help desk sa Bacolod City Government Center kag sa mga pay out centers.
Suno sa alkalde, kun sin-o man ang wala nadala sa lista sang makabaton mahimo magpadulong sa Bacolod City Government Center bwas para mahibaloan ang rason kun ngaa wala nadala sa lista bangod madamo ang ginkakas sa listahan.
