Tatlo ka mga mamalidha nagikan sa Makabayan bloc sa House of Representatives ang naghangkat kay President Ferdinand “Bongbong” Marcos Jr. nga magpatawag sang isa ka special session sa Kongreso agud makaconvene ang Senado bilang isa ka impeachment court para sa trial ni Vice President Sara Duterte.
Sila ang nagpagwa sang statement matapos ginpahayag ni Senate President Francis Escudero nga indi makapatawag sang kaugalingon nga special session ang Senado.
Sa joint statement nanday ACT Teachers Party List Representative France Castro, Gabriela Party List Representative Arlene Brosas, kag Kabataan Party List Representative Raoul Manuel, ginpahayag sang mga ini nga kun bukas ang Presidente sa special session, dapat nga himuon niya ini kag indi na maghulat pa sa luyag sang Senate President ukon House Speaker bangud nagademand sa karun ang mga pumuluyo sang accountability.
