Ginpasalamatan ni President Ferdinand Marcos Jr. si Israeli President Isaac Herzog bangud sa pag-atipan kag pagsuporta sa mga Filipino nga nagapabilin sa Israel sa tunga sang nagapadayon nga gyera sini batok sa Hamas kag Hezbollah militants.
Ginrelay ni Marcos Jr. ang mensahe sa Israeli leader paagi sa isa ka phone call sa Malacanang.
Suno sa Presidente, ang madasig nga assistance sang Israel sa pagsiguro sang kaluwasan sang mga Filipino ilabi na sa mabudlay nga mga tinion ang dako nga butang para sa Pilipinas.
Suno sa iya, ang Israel ang nagapabilin nga isa sa pinakamasaligan nga bilateral partners sa Middle East region bangud sa maragtason nga pag-inabyanay nga natabo na antes paman ang pagtukod sang Israeli state.
Suno kay Marcos, nagapabilin ang paglaom sang pungsod sa madasig nga pag-angkon sang kalinong kag sila ang magapadayon sa pagtukod sang mabaskog nga bonds sa tunga sang duha ka nasyon.
