Ginsiguro ni President Ferdinand Marcos Jr. nga may supisyente pa nga suplay sang langis ang pungsod sa sulod sang 51 ka adlaw, kadungan sang nagapadayon nga tikang sang gobyerno agud mapabilin ang supisyente nga imbentaryo sang fuel sa tunga sang gyera sa Middle East.
Sa mensahe sang presidente, iya ginbuyagyag nga nag-order na ang Philippine National Oil Company–Exploration Corporation (PNOC-EC) sang 1.04 milyon ka bariles sang diesel, kun sa diin 142,000 ka bariles na ang nadeliver subong nga semana kag ang nabilin ang ginalauman nga maga-abot sa bulan sang Abril.
Suno pa sa presidente, nagpagwa na ang Department of Budget and Management (DBM) sang P20 billion para sa pagbakal sang tubtob duha ka milyon nga dugang nga bariles sang langis.
Suno kay Pres. Marcos, makadugang ini sang napulo ka adlaw sa buffer stock sang Pilipinas.
Nauna na nga ginpahayag sang presidente nga bastante ang suplay sang krudo sang Pilipinas tubto Hunyo 30 sini nga tuig.
