Naghatag sang pasalig si President Ferdinand “Bongbong” Marcos Jr sa tanan nga Local Government Units nga nahalitan sang bagyo Tino nga indi mag-untat ang national government sa pagbulig sa probinsya sang Negros Occidental.
Kahapon nagbisita ang presidente sa Jose Pepito Montilla Garcia Sr. National High sa banwa sang Moises Padilla kag La Castellana Elementary School sa banwa sang La Castellana agud bisitahon ang mga apektado sang bagyo Tino.
Nagpatigayon si Marcos sang close door situational briefing upod kay Negros Occidental Governor Eugenio Jose “Bong” Lacson kag iban pa nga local government agencies, upod man sanday Energy Secretary Sharon Garin, Education Secretary Sonny Angara, Health Secretary Ted Herbosa, kag Department of Social Welfare and Development Secretary Rex Gatchalian.
Samtang, nagpanagtag man sang financial assistance ang DSWD nga P10,000 sa mga totally damaged ang balay kag P5,000 sa partially damaged.
Suno kay Governor Bong Lacson, nagpasalig ang presidente sa mga alkalde sang affected LGUs nga mahatag sang bulig ang national government apang gin-athag sini nga ang problema sa karun indi gilayon nga ma-address.
Samtang, nabaton na sang provincial government ang P50 million nga ginhatag sang national government.
Suno kay Lacson, tun-an pa kun sa diin gamiton ang budget, kun bala sa paghatag sang financial assistance ukon ibakal sang mga materyales sang balay para ihatag sa mga biktima sang bagyo Tino.
