Ginapasiguro sang Philippine Coast Guard (PCG) Negros Occidental nga mangin istrikto ini sini nga mga inadlaw ilabi pa nga magadugok ang mga pasahero sa mga pantalan bangud sang holidays.
Sa interview kay Lt. Commander Jansen Benjamin, ang bag-o nga commander sang PCG Negros Occidental, ginapasiguro sini nga mangin istrikto sila sa mga polisa tuhoy sa mga overloading sang mga cargo kag mga pasahero.
Dugang pa sini nga nakahanda ang ila nga mga response group agud madasig nga makaresponder sa tion nga kinahanglanon.
Samtang bilang kabahin man sang iya mga plano bilang bag-o nga commander sang PCG sa probinsya, ginatunguhaan sini nga mapabakod pa ang kolaborasyon nila sa ila mga friendly forces kaangay sang Bantay Dagat, Philippine National Police kag iban pa nga ahensiya sang gobyerno sa mga lugar nga may yara sang mga pwerto.
Ini bangud aminado si Benjamin nga gamay lang ang pwersa sang Coast Guard sa Negros Occidental.
Samtang, ginbuyagyag man sini nga naga-proceso na karun sang building permit ang kontraktor nga nagdaog sa bidding nga amo ang magatukod sang radar station sa BREDCO port.
Suno kay Benjamin, dako gid nga bulig sa operasyon sang PCG ang tukuron nga radar station.
