Nagbulig man ang Philippine Coast Guard agud nga matransport nagikan sa Escalante City padulong sa quarantine facility sa banwa sang EB Magalona ang mga overseas Filipino workers nga nastranded sadto sa Cebu kag nagpauli na diri sa Negros Occidental subong nga adlaw.
Nahibaluan nga ginkasugtan sang opisyales sang Bacolod City kag probinsya sang Negros Occidental nga sa quarantine facility sang probinsya dal-on ang 35 ka repatriated OFWs nga nastranded sa Cebu bangud naabutan sang Enhanced Community Quarantine (ECQ).
Ang mga ini ang i-isolate sa sulod sang 14 ka adlaw apisar nga may yara sang certificate nga nagapamatuod nga nakatapos na ang mga ini sang self-quarantine sa Cebu.
Sa interview sang Bombo Radyo Bacolod kay Commander Jansen Benjamin, pinuno sang Coast Guard Station Negros Occidental, alas 11:00 sang aga ang abot sang mga OFWs sa ciudad sang Escalante kag ginsugat sang PCG coaster.
Una naman nga ginpahayag ni Dr. Zeaphard Gerhart Caelian, pinuno sang Provincial Disaster Management Program Division (PDMPD) nga roro vessel ang pagasakyan sang mga ini kag idiretso sila sa EB Magalona para sa quarantine.
Gilayon nga magapatigayon sang rapid test ang Provincial Health Office kag kun may yara sang reactive suno sa iya, gilayon ini nga kuhaan sang swab.
Gindugang man sini nga mando ni Governor Eugenio Jose “Bong” Lacson ang pagquarantine sa mga ini bangud indi sini luyag nga masudlan liwat sang kaso ang probinsya ilabi na nga gaamat-amat na tahaw ang virus.
Nagahanda naman ang probinsya sa masobra 20 ka mga OFWs nga sunod nga irepatriate matapos makapauli ang una nga batch.
Suno kay Chief Petty Officer Joel Taganile, pinuno sang Coast Guard Escalante Sub-Station, sila ang nagtsekyar sang mga dokyumento sang mga OFWS.
Antes makasaka sa bus sang PCG ang mga OFW suno sa iya, gintsekyar ang ila nga medical certificate nga nagapamatuod nga sila ang naquarantine na kag ang ID sang mga ini agud matumod nga sila ang mga ginahulat sang PCG.
