Ginkumpirmar ni Commander Jansen Benjamin, pinuno sang Coast Guard Station-Negros Occidental nga nakahalin na sa Manila kahapon sang hapon ang roro vessel nga ginsakyan sang mga repatriated seafarers nga taga-Negros Occidental kag Bacolod City.
Nahibaluan nga 58 sa mga ini nagikan sa ciudad sang Bacolod samtang 44 naman ang taga-probinsya.
Sa interview sang Bombo Radyo Bacolod kay Benjamin, ginpahayag sini nga natalana ang barko nga magadungka sa Bredco port, mga alas-4:00 karon sa hapon.
Suno diri, may yara na sang ginpatpat nga mga tikang ang probinsya subong man ang city government angot sa pag-abot sang mga seafarers.
Ginpasalig man ni Benjamin nga hugot ang seguridad nga ila ginapatuman sa pantalan.
Samtang, ginkumpirmar man ni Bacolod City Vice Mayor El Cid Familiaran nga gilayon nga sugaton sang bus nagikan sa city government ang 58 ka mga seafarers nga Bacolodnon.
Ideretso ang mga ini sa Lopez Jaena Elementary School para sa mandatory 14-day quarantine.
