Nagapanawagan ang commander sang Coast Guard Station-Northern Negros Occidental sa mga pumuluyo nga mahimo makakita sang duha ka indibidwal nga makasampay sa ila nga lugar.
Sa karun padayon ang ginapatigayon nga search and rescue operation sang PCG sa duha ka mga mananagat sa ciudad sang Cadiz, Negros Occidental.
Ang namissing ang ginkilala nga sanday Edwin Hinojales, 17 anyos, Grade 11 student kag Joren Parochel, 22 anyos, lunsay residente sang Purok Pasil, Talabahan, Barangay Zone 1, Cadiz City.
Ginpahayag sang magulang ni Edwin nga wala pa ini makapaniyaga sang ginhagad sang iya amigo nga si Joren nga magpanagat.
Ginhambalan naman sang amay nila si Edwin nga magpahimuyong na apang ginpatalikod lamang ang ila amay kag naglakat upod ang iya abyan.
Naglaom sila nga makabalik ang duha alas-4:00 ukon alas-5:00 sang hapon apang pila na ka oras ang naglabay, wala gihapon ang mga ini nakapauli.
Sa interview sang Bombo Radyo Bacolod kay Commander Jansen Benjamin, padayon pa ang ila pagpangita sa duha nga namissing matapos magpalawod sang Hwebes.
Nakacoordinate naman ang Coast Guard sa ila counterpart sa Bantayan kag Northern Iloilo.
Panawagan ni Benjamin sa mga mananagat nga likawan gid ang magpalawod sa tion nga indi maayo ang panahon agud nga malikawan ang maritime incidents.
Dugang pa sini nga nagapangayo man siya sang bulig sa tanan nga makabati sa waragwagan nga kun may nasapwan ukon nakita nga duha ka indibidwal nga nasampay ang ipahibalo lamang sa Coast Guard.
