Masobra tres mil ka pasahero ang ginalauman sang Philippine Coast Guard Northern Negros Occidental Station sa ciudad sang Bacolod kag iban nga bahin sang probinsya subong nga obserbasyon sang fiesta minatay, Nobyembre 1.
Sa interview sang Bombo Radyo Bacolod kay Lt Jr Grade John Hofer Olis, Public Information Officer sang Philippine Coast Guard Northern Negros Occidental Station, kahapon naobserbahan ang pagtaas sang pasahero sa mga pantalan sa Nothern Negros.
Ang mga pantalan ang ginalakipan sang sa Pulupandan, Bredco port, EB Magalona, San Carlos, Cadiz kag Escalante City.
Suno kay Olis, mas madamo ang pasahero nga nag-abot sa Northern Negros sang Oktubre 30 kag ang mga pasahero nga nagsulod sa mga pantalan ang nagdangat sa 3386 samtang ang nagwa nagdangat sa 2981.
Suno diri, ini ang mas mataas kun ipaanggid sa mga nagligad nga inadlaw nga yara lamang sa 1500.
Ginalantaw nga mas madamo pa magdoble ang numero sang pasahero nga magabiyahe.
Dugang pa sini nga yara man ang katapos sang Disaster Reduction Management Office, Philippine Ports Authority, Philippine National Police kag Philippine Drug Enforcement Agency nga nagapahanumdom sa mga pasahero sang ginadumilian nga dal-on sa pagbiyahe.
Sa karun wala man sang narekord nga nakumpiskar nga ginadumilian nga butang.
Panugyan ni Olis, magbiyahe sang mas temprano agud nga malikawan ang paggutok sang mga nagabiyahe.
Dugang man sini nga kun may yara sang mga namonitor nga maritime incidents magtawag lamang sa 911 ukon sa 0956-426-2191.
May yara man sang malasakit booth nga magabulig sa mga pasahero samtang nagdeploy man ang Coast Guard sang personnel sa nagkalain lain nga patyo sa tagsa ka banwa kag ciudad sa Negros Occidental.
