Wala sang may narecord nga insidente sang pagkalumos apisar sa pagdagsa sang mga tawo sa baybayon sa una nga adlaw sang tuig 2026.
Sa interview sang Bombo Radyo Bacolod kay Lieutenant Junior Grade Richelito Arbis, Assistant Station Commander sang Coast Guard Station Northern Negros Occidental, nagdeploy sang 12 ka mga coast guard personnel sa nagkalain-lain nga baybayon sa ciudad sang Bacolod sa una nga adlaw sang bag-ong tuig.
Ini bangod ginalauman na ang pagdagsa sang mga tawo sa pila ka mga bayabayon agud mag-outing matapos ang pagsug-alaw sang bag-ong tuig.
Suno kay Arbis, wala sang may narecord nga drowning incident sa mga area nga nalibot sang mga otoridad kalakip na diri ang resort sang Villaroza, Alcala, Shelton Punta TayTay kag Villa Iska.
Pahayag sini nga dako ang bulig sang presensya sang mga kapulisan, barangay officials kag personnel sang Disaster Risk Reduction and Management Office sa pagsiguro sang seguridad sa lugar.
Samtang, ginalauman subong nga semana nga magadamo ang mga pasahero sa pila ka mga pantalan bangud madamo sang mga tawo ang magapauli na kag magabalik sa trabaho matapos ang holiday season.
Suno kay Arbis, may yara man sang mga kapulisan nga iga-deploy sa pila ka mga port sa probinsya sang Negros Occidental.
Pahayag sini nga bisitahon ang facebook page sang Philippie Coast Guard-Northern Negros Occidental agud nga mangin aware kag makahibalo sa mga update kag pahanumdom sa mga pasahero.
Pahanumdom man sini sa mga magabyahe nga magbook sang temprano online agud nga indi na kinahanglan magpila pa.
