Nagpungko na ang bag-o nga commander sang Philippine Coast Guard Station Negros Occidental.
Santo sa order, si Lieutenant Commander Jansen Benjamin ang nagpungko sa pwesto epektibo Nobyembre 29, bulos kay Lieutenant Senior Grade Rockliff Buling.
Si Benjamin ang anay commander sang PCG Station Negros Oriental samtang si Buling naman ang ginsaylo sa National Capital Region.
Sa interview sang Bombo Radyo kay Benjamin nga tumandok sang Bacolod City, daw kaangay lamang nga handom nga natuman ang pagpungko sa PCG Station Negros Occidental bangud nakabalik siya sa dutang natawhan.
Sa karun, si Benjamin ang nagapuyo sa Talisay City sa diin siya nakapangasawa.
Aminado naman ini nga madamo siya sang eksperyensya antes nagpungko sa nasambit nga posisyon bangud nakaagi ini assign sa Southeastern Mindanao, Davao del Norte kag Iloilo bilang Marine Environmental Protection Commander.
Ginpasalig man sini nga padayunon niya ang mga programa nga ginsuguran ni Buling.
Kadungan sang iya pagpungko amo ang paghanda sang PCG may kaangtanan sa bagyo Tisoy apang suno sa iya, nakahanda naman ang tanan nga mga personnel.
