Nagpasalig ang bag-o nga City Director sang Bacolod City Police Office nga pasangkaron pa gid ang presensya sang kapulisan sa kada Barangay sa ciudad.
Ginpahayag ni Police Colonel Eugene Rebadomia, nga nagpasalamat siya sa pagrekomendar sa iya bilang BCPO director kag nagpasalig nga padayunon ang mga proyekto nga ginsuguran ni Police Colonel Joeresty Coronica.
Suno kay Rebadomia, mas pabaskugon pa sini ang kampanya batok sa ilegal nga druga kag pagatutukan ang mga unsolved cases kag mga posible nga magluntad nga krimen sa ciudad.
Plano man sini nga i-mobilize ang tanan nga kapulisan agud mapabatyag ang presensya sa ila mga nasakupan nga lugar.
Nahibaluan nga opisyal na nga magaserbe bilang bag-o nga BCPO Director si Rebadomia matapos ang Turnover of Command ceremony kahapon sang hapon, Pebrero 9.
Ginpangunahan ni Police Regional Office – Negros Island Region Director Police Brig Gen. Arnold Thomas Ibay ang aktibidad kaupod ang presensya ni Bacolod City Mayor Greg Gasataya kag pila ka mga opisyales sang BCPO.
