Ginapakamaayo sang Philippine Drug Enforcement Agency Region 6 nga makaresume naman ang pag-upod nila sa mga personnel sang Bureau of Jail Management and Penology (BJMP) sa pagpatigayon sang greyhound operation sa mga detention facilities sang ahensya.
Sa interview sang Bombo Radyo kay PDEA Region 6 Director Alex Tablate, temporaryo nga gin-untat ang greyhound operation upod ang PDEA bangud sa COVID pandemic kun sa diin ginalikawan nga makadala sang coronavirus ang mga tawo nga halin sa gwa sang prisuhan.
Apang aminado naman si Tablate nga regular nga ginapatigayon ang greyhound kaupod ang PDEA sang wala pa ang pandemic.
Sa sini nga operasyon suno kay Tablate, madamo nga kontrabando ang makumpiskar sang mga otoridad kaangay sang improvised weapons.
Kun basehan naman ang nagakatabo sa New Bilibid Prison nga yara sa idalom sang Bureau of Corrections suno sa PDEA official, tuman ka crucial ang cellphone agud nga matigayon ang transaction kun sa diin ang inmate ang nagapangita sang katransaksyon sa gwa sang prisuhan nga amo ang magapangita sang sarang madeliveran sang shabu.
Suno kay Tablate, may mga high-profile inmates nga nagapadayon sang sini nga modus bisan yara na sa prisuhan paagi sa pagpalusot sang cellphone gani dapat nga makumpiskar ang gadget.
