Nagapati ang regional director sang Philippine Drug Enforcement Agency (PDEA) Region 6 nga gingamit lamang ang panday nga nakuhaan sang lima ka kilo nga suspected shabu nga nagabalor sang P34 million sa port sa syudad sang Escalante, Negros Occidental sang Hwebes sang gab-i.
Sa interview sang Bombo Radyo kay Alex Tablate, indi man societal status ang ginabasehan sa isa ka tawo kun ini ang imbuldado sa iligal nga buluhaton.
Suno kay Tablate, mahimo nga sa Luzon naghalin ang shabu nga nakompiskar sa subject person nga si Vicente Sepuesca, isa ka construction worker kag residente sang Araneta, Barangay Sum-ag, Bacolod City.
Suno kay Tablate, ginahibalo pa nila sa karun kun may nabaligya na ang iban nga dala sang subject person antes pa man ini maintercept sa Escalante port.
Ginpahayag man sang regional director sang PDEA-6 nga isa lang kuntani ka kilo ang igarecover sang mga otoridad kay Sepuesca apang ang iban sini ang nakuha sa iya nga salakyan.
Ginalantaw man sini nga isa lamang ang ginhalinan bangud santo sa ila nga back tracking ang narekober nga suspected shabu ang nagikan sa Cebu kag pareho ang packaging sa tatlo ka kilo nga suspected shabu nga naintercept sang tinalikdan nga binulan sa Bredco Port.
Suno kay Tableta mahimo nga sa National Capital Region (NCR) naghalin ang illegal nga druga bangud santo sa ila nga assessment ang mga narecover nga suspected shabu ang ginabiyahe padulong sa nagkalain-lain nga bahin sang pungsod.
Kaangay lamang sang naintercept sa Bredco port nga ginpaagi sa Aklan antes paman gintabok sa syudad sang Bacolod gani ginalantaw ni Tablate nga ini man ang natabo sa naintercept sang Hwebes sang gab-i nga ginpaagi lang sa Cebu.
Ginpahayag man ni Tablate nga santo sa ila assessment mahimo nga international drug sindicate ang ginhalinan sang shabu bangud nauso sa karun ang importation sang illegal nga druga.
Suno diri, ang mga modus sang mga nagapasulod sang illegal nga druga ang ginapaagi sa coastlines kun sa diin nangin crucial naman sa mga otoridad.
Nagapasalamat man ini nga naintercept ang binulto sang suspected shabu agud indi na madugangan ang mga mabiktima sini.
Ginhatagan man sini sang credit ang Escalante City Police Station nga nangin kaupod sang mga ini sa pagkasa sang operasyon.
Suno kay Tablate ang confiscated items ang ipaidalom sa test sa crime laboratory kag sa tion nga makompirmar nga illegal nga druga, ang result ang iattach sa documents sa pagpasaka sang kaso sa korte.
Nagalaom man ang regional director sang PDEA 6 nga magapadayon ang komunidad sa pagkooperar sa ila agud nga madamo ang mga successful operations ang mapatigayon batok sa iligal nga druga.
Ginpasiguro man sini nga hugot nga ginabantayan si Sepuesca sang mga kapulisan sa syudad sang Escalante.
Samtang, nakadepende na sa korte ang kabug-aton sang kaso nga ipasaka sa suspetasado.
Ginatinguhaan man sang PDEA 6 nga malakip sa destruction ang mga iligal nga druga nga nakompiskar sa Bredco port.
