Aminado ang pinuno sang Philippine Drug Enforcement Agency Region 6 nga nagapabilin ang Negros Occidental nga transshipment point sang iligal nga druga.
Nahibaluan nga may pila ka nadakpan sa isla sang Panay nga nagtuad nga halin sa Negros Occidental ang ila nga supply sang illegal drugs.
Sa interview sang Bombo Radyo Bacolod kay PDEA Region 6 director Alex Tablate, aminado ini nga dako ang recovery sang iligal nga droga sa ciudad sang Bacolod kag Negros Occidental kag padayon ini nga nagaserbe nga alagyan ukon transshipment sang droga bangod may ginkompiskar man ang operatiba sa nakaligad lang nga nagikan sa Cebu.
Gintuad man sini nga sangdamlag lang, may yara sang nakompiskar nga kapin 800 ka gramos nga droga sa nasambit nga lugar.
Apang sa isla sang Panay suno sa iya, wala sang dalagko gid nga recovery.
Samtang wala ginadula sang Philippine Drug Enforcement Agency Region 6 ang posibilidad nga nagagamit ang mga durugista sa Negros Occidental sang iban nga mode of transportation agud mapatabok sa probinsya sang Iloilo ang iligal nga druga.
Sang damlag lang, may nadakpan nga durugista sa Banate, Iloilo kag ginpahayag sini nga nagikan sa Negros Occidental ang iya supply.
Sa interview sang Bombo Radyo Bacolod kay PDEA Region 6 director Alex Tablate, tumandok sang ciudad sang Silay ang nadakpan sa Banate.
Suno sa iya, kun lantawon ang geography sang rehiyon, nagalapitanay lamang ini gani indi mabudlay nga magpangita sang coastal areas nga pwede maagyan sang mga ini apisar sa instrikto nga seguridad sa mga pwerto.
Apisar sa instrikto nga seguridad sang mga port agud makatabok sa pihak nga isla suno sa iya, nagapangita sa gihapon sang iban nga alagyan ang mga durugista sa pagpatabok sang mga iligal nga druga.
Mahimo suno sa iya nga nagalikaw ang mga drug personality nga maglabay sa BREDCO Port patabok sa ciudad sang Iloilo bangud hugot ang pagbantay sang Philippine Coast Guard sa pwerto gamit ang canine units
