Nagapati ang Philippine Drug Enforcement Agency Region 6 nga honest lamang si Presidente Rodrigo Duterte sa pagpahayag nga nagsala ini sa una niya nga pahayag nga masarangan sini tapnaon ang problema sa illegal nga druga sa sulod sang tatlo tubtub anom ka bulan.
Suno kay PDEA Region 6 director Alex Tablate, mangin ang mga Pilipino ang wala man naglaom nga malala ang illegal drug situation halos anom ka tuig ang nakaligad.
Sa pihak sang pahayag sang presidente suno kay Tablate, ginhimo man sang gobyerno ang tanan agud nga matapna ang illegal nga druga kag dako na ang kinalain sa karon sangsa antes ang pagpungko ni Duterte sa pwesto.
Bangud sa administrasyon ni Duterte suno kay Tablate, nakit-an ang kalala sang drug situation kag nakilala man kun sanday sin-o ang imbulbado diri, kalakip ang mga opisyales sang gobyerno.
Bangud sini, komporme si Tablate kay Duterte nga indi basta-basta matapna ang drug problem sa sulod sang anom ka bulan bangud kinahanglan diri ang sustainability kaangay sang Barangay Drug Clearing Program.
Sa karon suno sa PDEA official, wala na sang dalagko nga drug laboratory sa Pilipinas kundi imported ang illegal nga druga gani dapat nga tutukan ang coastline sang pungsod.
Kun wala man natapna ang illegal drugs suno sa iya, nakit-an naman sang mga Pilipino nga may ginahimo ang gobyerno.
