Ginalantaw sang Philippine Drug Enforcement Agency (PDEA) Region 6 nga ang nakuha nga tatlo ka kilo nga shabu sa duha ka persona sa sulod sang Roll On Roll Off (RoRo) vessel sa Bredco Port sang Lunes ang kaupod sang mga dalagko nga mga nakumpiskar sa Luzon.
Suno kay PDEA Region 6 Director Alex Tablate, madamo sang mga nakumpiskar nga iligal nga droga tinalikdan nga tuig gikan sa National Capital Region (NCR) kalakip na sa mga areas sang Central Luzon, Zambales kag Cavite nga nagdangat sa kapin 1.6 tonns nga shabu nga nagabalor sang masobra P11 billion.
Nagapati si Tablate nga ang mga narecover gikan kanday Aslanie Desomangcop Usman, residente sang Lopez Jaena St., Brgy. 31, Bacolod City kag Jalanie Mohammad Ambulo, residente sang Villa Angela Subdivision, Barangay Villamonte, Bacolod City ang wala lang nadala sa nakumpiskar bangod parehas gid ang packaging nga green nga chinese tea bag.
Kasubong man sini ang mga narecover sang nakalikad nga balor P1.5 kilograms sang shabu sa San Carlos City.
Suno kay Tablate, dako nga butang nga nakumpiskar ang iligal nga droga kag sa karun isa man sa ginakabig mainit nga lugar sa imbestigasyon ang Islamic Center sa Barangay 31, Bacolod City kun sa diin naka-address ang isa ka suspetsado.
Ginalantaw nga mahimo sa nasambit nga lugar igadagdag ang shabu apang wala naman ginadula sang PDEA ang posibilidad nga ang iligal nga droga ang igapanagtag man sa mga cohorts sa mga kalapit nga syudad kag banwa sa Negros Occidental.
Ginpasalig naman ni Tablate nga wala nila ginatumod nga may kaangtanan ang mga Muslim Community sa pagpasulod sa iligal nga droga, kag ginalantaw sang mga ini nga natabuan lang nga Muslim ang mga suspetsado.
