Nagpanawagan ang pinuno sang Negros Occidental Provincial Disaster Management Program Division (PDMPD) nga pangamuyuan ang kaluwasan sang mga residente nga nagapuyo malapit sa Taal Volcano.
Madumduman nga gindeklarar sang Philippine Institute of Volcanology and Seismology (Phivolcs) kahapon nga yara na sa alert level 4 ang bulkan matapos ang inoras nga phreatic eruption kag paggwa sang lava sa crater sini.
Sa interview sang Bombo Radyo kay Dr. Zeaphard Gerhart Caelian, nagpasalig ini nga padayon nga ginamonitor ang sitwasyon sang nagapadayon nga eruption sang Taal Volcano.
Suno sa iya, bangud nga napalibutan sang tubig ang bulkan, posible nga may magluntad nga landslide ukon volcanic tsunami kun maglupok ini gani naghingyo siya nga pangamuyuan ang kaluwasan sang mga residente.
Ginkompirmar man ni Caelian nga wala sang dapat nga kabalak-an ang probinsya bangud independent ang Mt. Canlaon gani indi ini konektado sa bisan ano nga bulkan.
Gindugang man sang pinuno nga gindeklarar na sang Oktubre nagligad nga tuig nga normal na ang status sang Kanlaon kag yara na ini sa alert level 0.
Nagpahanumdom man ini nga magpadayon lang sa pagpreparar kag mangin alerto sa kun ano man nga posible nga matabo.
