Ginkumpirmar sang pinuno sang Provincial Disaster Management Program Division (PDMPD) nga wala sila sang may narekord nga insidente may kaangtanan sa Semana Santa.
Sa interview sang Bombo Radyo Bacolod kay Dr. Zephard Gerhart Caelian, ginpahayag sini nga wala gid sila sang may namonitor nga mga Holy Week related incidents.
Indi kaangay sang nakaandan, wala na sila nagdeploy sang mga DRRMO officers sa mga simbahan ukon pampubliko nga lugar nga masami ginadagsa kun Semana Santa.
Suno sa iya, bangud sa ginapatuman nga enhanced community quarantine sa probinsya, tanan nga mga hilikuton angot sa Holy Week ang ginpatigayon paagi sa online streaming.
Madumduman nga ginpalawig pa ang ECQ sa Negros Occidental tubtob sa Abril 30 agud nga matapna na gid ang coronavirus disease 2019 (COVID-19).
Sa pinakaulihi nga data, nagapabilin sa isa ang kaso sang coronavirus sa Negros Occidental kag ini ang naka-recover na.
