Nagpaandam ang Partido Demokratiko Pilipino–Lakas ng Bayan (PDP Laban) batok sa mga politiko nga magasuporta sang impeachment case ni Vice President Sara Duterte.
Suno sa partido, indi nila pagbatunon sa ila partido ang mga mamalidha nga magaboto pabor sa impeachment sang bise presidente.
Suno diri, ila i-blacklist ang mga ini kag indi na pahanugutan nga magpadalagan sa idalom sang PDP Laban sa mga masunod nga eleksyon.
Dugang pa, posible man nga magpagwa sang katapat nga kandidato batok sa ila.
Paathag sang PDP-Laban, indi ini pagpamahog kundi kabahin ini sang ila ginatawag nga “political accountability” angot sa ginapatihan politically driven impeachment batok kay VP Sara Duterte.
Padayon ang progreso sang impeachment complaints batok sa bise presidente sa House Committee on Justice matapos gin-aprubahan ang Articles of Impeachment.
Natalana nga dal-on sa plenaryo sang Kamara de Representantes ang impeachment report agud pagabotohan nga nagakinahanglan sang 106 boto antes ini masumiter sa Senado nga maga-serbe bilang impeachment court.
