Nag-file ang PDP-Laban sang open letter sa Korte Suprema kahapon, Nobyembre 3, nga nagahingyo nga i-resolba na ang mga pending nga petisyon nahanungod sa arrest warrant batok sanday former President Rodrigo Duterte kag Senator Ronald “Bato” Dela Rosa may kaangtanan sa ila mga kaso sa International Criminal Court (ICC).
Suno kay PDP-Laban spokesperson Atty. Ferdinand Topacio, luyag lamang nila nga mapalab-ot ang posisyon sang partido kag maganyat ang mga mahistrado nga magpagwa na sang desisyon.
Ginpahayag man sang partido nga halos 600 na ka adlaw nga naka-pending ang habeas corpus petition para kay Duterte, samtang ila man gina-request ang madasig nga pagresolba sang motion for reconsideration ni Dela Rosa.
Kadungan sini, nagpatigayon sang protesta ang mga miyembro sang PDP-Laban kag mga tagasuporta ni Duterte sa atubang sang Korte Suprema sa Manila nahanungod sa desisyon sa legalidad sang mga warrant nga gin-isyu sang ICC.
Madumduman nga gin-aresto si Duterte sang Marso 11, 2025 kag gindala sa The Hague agud atubangon ang kaso nga crimes against humanity angot sa war on drugs.
Natalana nga mag-umpisa ang trial sa Nobyembre 30, 2026.
Samtang, ginapangita naman sang ICC si Dela Rosa, nga indi na makit-an sa publiko humalin pa sang Marso.
