Ginapanawagan sang Deputy Secretary General for Visayas sang Partido Demokratiko Pilipino – Lakas ng Bayan (PDP–Laban) nga ipakita sang mga pumuluyo sa Negros Occidental ang pagsuporta kay Vice President Sara Duterte.
Sa interview sang Bombo Radyo Bacolod kay Atty Jayvee Hinlo, 2022 pa lamang ginapanugyan na sang PDP-Laban nga magpapili bilang Presidente si VP Sara.
Apang ginpili sini nga magkooperar sa pagpangaluyag sa iya sang kampo ni President Ferdinand “Bongbong” Marcos Jr. nga sila ang mangin tandem, kag ini ang magpapili nga Bise Presidente.
Ini man ang rasun nga antes ang pagdeklarar kahapon ni VP Sara nga siya ang magapapili para sa Presidential seat sa 2028, ang Bise Presidente ang nagpangayo sang pasaylo nga ginsuportahan sini si Marcos sa pagdaog bilang Presidente.
Suno kay Hinlo, wala gid ini naglaom nga indi tumanon ni Marcos ang ila mga kasugtanan.
Aminado ini nga indi matumod kun bangod kay VP Sara gani nagdaog si Marcos, apang pahanumdom ni Hinlo nga antes paman si VP Sara amo ang nagapanguna sa Presidential survey.
Dugang pa sini nga kun nagdayun sa pagpapili bilang Presidente si VP Sara, mahimo nag-atras na sa pagpapili si Marcos.
Suno diri, may mga grupo nga nagakontra kay VP Sara agud ini ang indi mangin Presidente bangod lamang sa sila ang ginakontra ni former President Rodrigo Duterte.
Pahayag sini nga nagakahangawa ang pila ka partido nga kaangay sa amay, sila ang kontrahon man ni VP Sara kun ini ang mangin Presidente, gani ginatinguhaan nga siya ang ma-impeach.
Sa pahayag ni VP Sara nga handa sini nga ihalad ang iya kaugalingod para sa pagserbisyo sa pungsod, ang nagapakita nga wala na ini sang labot sa impeachment.
Ginapanawagan ni Hinlo sa mga VP Sara supporters sa Negros Occidental nga maggwa na kag ipakita nga ang probinsya ang nakasuporta kay Vice President Sara Duterte.
