Nagapati ang deputy executive President for Visayas sang Partido Demokratiko Pilipino – Lakas ng Bayan (PDP-Laban) nga indi “in aid of legislation” ang ginapatigayon nga imbestigasyon sang House Quad Committee hearing kundi personal nga pagpang-atake sa pamilya Duterte.
Sa interview sang Bombo Radyo Bacolod kay Senatorial aspirant Atty Jayvee Hinlo, ang imbestigasyon sang House Quad Committee ang nakasentro lang sa drug war campaign, kag alegasyon sang extra judicial killings sang nakaligad nga administrasyon kasubong man ang gina-alegar anomalya sa budget spending sang Office of the Vice President.
Ukon sa malip-ot nga pulong, ang target lamang amo si former President Rodrigo Duterte kag Vice President Sara Duterte.
Apang ginakwestyon ni Hinlo kun ngaa ang confidential fund lamang sang OVP ang ginabatikos apisar nga may mas dako nga confidential fund ang Office of the President kag iban pa nga mga ahensya.
Dugang pa sini nga dapat ipakita ang itimize audit sang Commission on Audit sa Congressional hearing.
Pahayag sini nga kun anti-corruption ang lagas ang Kongreso, suhestyon sini nga dapat lantawon man ang rasun sa wala naganubo nga presyo sang bugas sa Department of Agriculture kag flood control projects sang Department of Public Works and Highways.
Nagakasubo man si Hinlo sa nagakatabo apisar nga ang Duterte kag Marcos ang updanay man sadto sa UniTeam.
Nagapati ini nga may kasugtanan sanday VP Sara, President Bongbong Marcos kag Senator Imee Marcos tuhoy sa plastada nila sa 2028 Elections, apang wala pa natunga ang termino sang Marcos Administration ang kasugtanan ang naguba na.
Paathag ni Hinlo nga ginalantaw nila ang pulso sang pumuluyo kag nakita nga madamo na ang nagareklamo sa administrasyon gani ang PDP ang magapartisipar gid sa 2025 Midterm Elections.
Paathag sini nga siya lamang ang naga-isahanon sa Senatorial slate sang PDPnga gikan sa Visayas kag magaserbe nga tingog para sa Bacolod City, Negros Occidental kag Negros Island Region.
Samtang, nagapati ang deputy executive President for Visayas sang Partido Demokratiko Pilipino – Lakas ng Bayan (PDP-Laban) nga indi makasaka sa Korte Suprema ang mga kaso batok kay Vice President Sara Duterte.
Sa interview sang Bombo Radyo Bacolod kay Senatorial aspirant Atty. Jayvee Hinlo, bangod impeachable official ang Bise Presidente, ini ang kinahanglan anay nga ma-impeach sa pwesto.
Suno diri, mahimo nga mapadayun ang imbestigasyon kag trial, apang pagdangat sa punta indi gihapon madagdag ang verdict.
Paathag sini nga makabig paglapas sa layi kun prisuhon ang Bise Presidente bangod santo sa layi indi dapat maapektuhan ang pagtrabaho.
Suno kay Hinlo, indi na matuman ni VP Sara ang iya papel bilang Bise Presidente kun siya ang yara sa carcel.
Gani sa pagpati sang abogado, wala sang matabo sa imbestigasyon sang Department of Justice kag Office of the Ombudsman.
Ini man ang rasun kun ngaa ginapatapos anay sa pwesto ang Presidente antes ipaidalom sa regular trial.
Pahayag ni Hinlo nga dapat paminsaran sang administrasyon ang konsekwensya sang ginahimo sang ila kaalyado.
Suno diri, sa tion nga ifile ang impeachment complaint, si Vice President Duterte ang mahatagan sang tyansa nga makasabat kag mahimo sini ipagwa ang tanan nga baho sang administrasyon.
Dugang pa sini nga sa impeachment proceedings, dapat makakuha sang one-third votes sa House of Representatives kag two-third votes gikan sa Senado, kun sa diin ginalantaw nga ini ang indi makalusot.
Ini ang magakinahanglan man sang dako nga pondo, nga mauyang lamang kun indi mangin madinalag-on.
Paandam sini nga kun magpadasodaso sa desisyon, basi makahimo sang desisyon nga indi na mabawi.
