Ginpaidalum na sang gobernador sa Negros Occidental sa Red Alert status ang Provincial Disaster Risk Reduction and Management Council – Emergency Operation Center kag tanan nga concerned agencies para sa Barangay and Sangguniang Kabataan Elections kag Tigkalalag.
Sa ginpagwa nga Memorandum Order No. 10-18 series of 2023 ni Negros Occidental Governor Eugenio Jose “Bong” Lacson, ang Red Alert Status ang epektibo humalin Oktobre 28sumugod alas-8:00 sang aga tubtob sa Nobyembre 3, alas-8:00 sang aga.
Bangod sa derektiba, tanan nga concerned government agencies kag offices, kasubong man City kag Municipal Disaster Risk Reduction and Management Offices (DRRMOs) ang gina-abisuhan nga ipasaka sa red alert status ang preparasyon sa pagprotekta sang kabuhi ukon propedad inkaso may magluntad nga emerhensya sa eleksyon kag tigkalalag.
Kalakip diri ang pagpasanyog pa sang safety measures kag pagplastar sang deployment sang mga responders sa nagkalainlain nga mga areas of convergence ukon mga lugar nga ginapadulungan sang dako nga numero sang indibidwal kaangay sang polling precincts kag sementeryo.
Sa interview sang Bombo Radyo Bacolod kay Negros Occidental PDRRMO Head Irene Bel Ploteña, sa tion sang red alert status, sila ang may protocol sa pagpalapta sang warnings kag advisories sa publiko kag mga stakeholders natuhoy sa preparasyon kag impormasyon may kaangtanan sa BSKE kag Undas.
Magakoordinar man ang Municipal kag City DRRMO sa ila tagsa ka Election Officers kun sa diin sila ang ginapasumiter sang preparedness measure tubtob lamang subong nga adlaw, Oktobre 26.
Ang Emergency Operation Center (EOC) ang nagapreparar man sang reports sa sitwasyon sa idalum pinaagi sa monitoring sang tagsa ka local government units (LGUs) sa eleksyon kag Undas.
Pasalig ni Ploteña nga 24/7 ang operasyon sang EOC, kag hinali makabatun sang report sang pagpanghangkat nakahanda man ang mga ini sa deployment.
May mga nakapreposition man nga mga kapulisan sa nanarisari nga bahin sang probinsya.
Ginpahanumdom man ni Ploteña sa mga pumuluyo nga seguruhon ang panimalay antes magpadulong sa mga points of convergence kaangay sang polling precincts kag sementeryo agud malikawan ang kinawatay kag sunog.
