Ginpangabay sang Provincial Election Supervisor sa Negros Occidental nga buylugan sang tanan ang pagpatigayon sang malinong kag matawhay nga eleksyon subong nga 2025.
Kaina sang aga, ginpatigayon ang peace covenant signing sang mga election aspirants sa provincial level sa Negros Occidental Police Provincial Office.
Ini ang gintambungan sang nanarisari nga pamunuan sang mga ahensya sang gobyerno sa Negros Occidental partikular na si Provincial Election Supervisor Atty Ian Lee Ananoria.
Apang matalupangdan nga ilisipon lamang ang mga nagtambong nga electoral aspirants gikan sa gobernatorial, vice governor, board members kag district representatives gikan sa 1st kag 6th District.
Una na nga ginpahayag nga voluntary lamang ang pagpirma sa peace covenant, apang ginpanawagan sa tanan nga provincial level election aspirants nga makig-isa agud ipakita ang ila commitment sa malinong, patas, tampad kag matawhay nga eleksyon.
Sa speech ni Ananoria, ginpahanumdom sini nga ang mga kandidato, aspirants, community leaders, kag mga pumuluyo ang naga-isa sa panawagan sang malinong kag patas nga eleksyon.
Ini bangod ang election process ang pundasyon sang demokrasiya sang mga Pilipino kun sa diin ang tanan ang ginahatagan sang responsibilidad nga makapili sang magadumala sa pungsod para sa kaayuhan sang tanan.
Pahanumdom naman sini sa mga kandidadto nga kun maghatag sang ila plataporma ukon promisa, seguruhon nga ini ang bukal sa tagipusuon kag tumanon.
Samtang dapat nga batunon man ano man ang resulta, magadaog man ukon mapierde sa eleksyon.
Pangabay sini nga indi magdangat sa paghumo sang kinagamo ukon political violence ang eleksyon, kag respetuhon sang mga kandidato ang kagustuhan sang pumuluyo.
Ginpasalig naman sini nga sila sa Commission on Elections (Comelec) ang gilayon man nga magaproklamar sang matuod nga mga daog sa piniliay santo sa resulta sang certificate of canvass sang Automated Elections.
