Ginmanduan ni Pope Francis ang isa ka Italian Cardinal nga magbisita sa Moscow sini nga semana agud magbulig sa pagtapos sang gyera sa Ukraine, bilang follow up sa nauna nga pagbisita sa Kyiv.
Santo sa statement, si Cardinal Matteo Zuppi ang magapadulong sa Russian capital bwas tubtob sa Huwebes.
Ang mayor nga purpose sang inisyatibo amo ang maduso ang humanitarian gestures, nga makabulig sa paghuman sang solusyon sa karun nga malala nga sitwasyon kasubong man sa pagpangita sang pamaagi agud nga malab-ot ang nagakadapat nga kalinong.
Indi pa maathag kun sin-o ang atubangon ni Zuppi sa Moscow.
Nahibaluan nga nakigkita man ini kay Ukrainian President Volodymyr Zelenskiy kag mga religious leaders sa Kyiv sang Hunyo 6.
Kun ang 67 anyos nga si Zuppi ang makigkita kay Russian President Vladimir Putin, siya ang mangin isa sa mga labing-una nga foreigners nga makahinun-anon diri humalin sang natabo ang aborted mutiny batok sa Russian military sang weekend.
Apang ginapahayag man nga yara sa risgo nga indi madayun ang byahe ni Zuppi bangod sa attempted mutiny kag confusion nga nagapalibot sa issue.
Tinalikdan nga semana, ginpahayag ni Zuppi nga magakonsulta ini sa Santo Papa antes magbyahe padulong sa Moscow.
May kaangtanan sa pagbisita sini sa capital city sang duha ka pungsod, paathag sini nga ini ang pattern nga importante nga tahion agud masolbar ang konflikto.
Ginalauman nga makigkita si Zuppi kay Patriarch Kirill, ang pinuno sang Russian Orthodox Church.
Si Kirill ang isa sa malapit nga kaalyado ni Putin kag dako nga supporter sang Russian invasion sa Ukraine nga tikang agud mapunggan ang impluwensya sang West.
Ang paghatag sini sang kabug-usan nga suporta sa gyera ang nagtuga naman agud magbahin-bahin ang Orthodox Christian communities sa kalibutan.
Ang statement sang Vatican nga nagmensyonar sang humanitarian gestures ang ginalantaw nga nagarepresentar sa request sang Kyiv kag sa kagustuhan sang Vatican nga makabulig sa repatriation sang kabataan nga Ukrainian.
Ginabanta sang Kyiv nga kapin 19,500 ang mga kabataan nga gindala sa Russia ukon sa Crimea nga okupado na sang Russia humalin sang Pebrero 2022, nga ginakondenar sang mga ini bilang illegal deportations.
Ginhingyo ni Zelenskiy sa Vatican nga suportahan ang iya nga unconditional peace plan, nga nagapanawagan sa pagbalik sang territorial integrity sang Ukraine, pag-atras sang Russian troops, pag-untat na sang kapintas kag pagpabalik sang state borders sang Ukrain.
