Nagpatigayon sang peace walk ang Federation of Urban Poor humalin sa Goldenfield Commercial Complex padulong sa monumento ni Ninoy Aquino sa Araneta Street, Bacolod City kahapon kadungan sang 36th EDSA People Power anniversary.
Sa interview sang Bombo Radyo kay FedUp Provincial Coordinator Joy Arabelo, ang nasambit nga event ang may thema nga “People Power is Vote Power,” kun sa diin nagpatigayon sila sang prayer offering agud dumdumon ang natabo 36 ka tuig na ang nakaligad.
Suno kay Arabelo, nagapadayon sila sa pagkomemorar sang People Power revolution agud indi malipatan ang natabo sang 1986 kun sa diin wala sang may ginpahog kag wala sang may ginpilit nga magpadulong sa EDSA kundi mismo ang mga tawo ang nagdesisyon para sa ila kaugalingon.
May kaangtanan sa tema, nagpahanumdum man ang provincial coordinator nga may yara ang tagsa-tagsa sang gahom nga magpili sang pinuno bangud ang maayo ang pinuno ang nagatuga sang maayo nga gobyerno.
Suno diri, samtang nagahilapit ang Eleksyon, dapat nga magpili sang maayo, tamad kag wala bahid sang korapsyon nga pinuno.
Isa man si Atty. Jomax Ortiz sa mga nagpanawagan kay anay Presidente Ferdinand Marcos nga magpanaog na sa pwesto sang tuig 1986 kun nsa diin natabo ang EDSA People Power Revolution.
Sa interview sang Bombo Radyo Bacolod kay Ortiz, may buot na siya sang ginpamunuan ni Marcos ang Pilipinas sa malawig nga tinion kag nahangpan naman sini ang mga nagakalatabo sa palibot.
Sang nagluntad ang People Power Revolution sang February 25, 1986 suno kay Ortiz, madamo sang nag-udyak matapos nga nagpaamulya na si Marcos sa Hawaii.
Ginpahayag man sini nga madamo man sang naipit sa panahon ni Marcos magluwas sa madamo nga hinimuan.
Suno diri, wala sang question sa una nga duha ka termino ni Marcos bangud sa ginpatukod nga infrastructure kag nangin maayo ang ekonomiya sang Pilipinas.
Apang sang ulihi na nga termino sin,i didto naglain ang pagpalakat sini sa gobyerno kun sa diin ginakontrolar naman ang media.
Nabatyagan naman nga indi na maayo ang nagakalatabo sa palibot kag kinahanglan na nga may mabulos kay Marcos gani napatigayon ang EDSA People Power Revolution sang 1986.
