Nag-umpisa na sa transport strike ang grupo sang traditional jeepneys sa pila ka bahin sang ciudad sang Bacolod.
Madumduman nga una na nga gin-anunsyar ni Bacolod Alliance of Commuters, Operators and Drivers Inc. (BACOD) President Rudy Catedral nga sila ang magapatigayon sang duha ka adlaw nga rally protesta subong nga Nobyembre 29 tubtob bwas, Nobyembre 30.
Sa interview sang Bombo Radyo Bacolod kay Police Captain Rondyl Tapang, station commander sang Bacolod City Police Station 3, alas-6:00 subong nga aga, nag-umpisa na sa pagtipon ang mga traditional jeepney drivers kag operators sa Bata Flyover.
Maathag naman ang instruction gikan kay Bacolod City Police Office (BCPO) Director Police Col. Joeresty Coronica sa pagseguro sang kapulisan sa pagpatigayon sang peaceful rally protest.
Magluwas sa augmentation sang mga personnel gikan sa Police Stations, ang BCPO headquarters ang nag-augment man sang dugang nga police personnel sa pagbantay sa mga rally sites.
Pahanumdom ni Tapang nga may-ara sang kinamatarong ang mga jeepney drivers kag operators sa pagpatigayon sang protesta apang dapat may-ara sang permit.
Dugang pa sini nga bilang democratic society, ang mga ini ang may kinamatarong kun indi luyag magbyahe, apang indi dapat balabagan ang mga luyag magbyahe nga traditional jeepneys.
Pangabay sini nga mangin matawhay kag wala sang mangin bayolente sa duha ka adlaw nga transport strike.
