Patay ang isa ka pedestrian matapos nga mabungguan sang Fuso Fighter Truck sa Bacolod-Silay Access Road, malapit sa Palm Estate Subdivision, Hacienda Otilia Barangay Efigenio Lizares, Talisay City, Negros Occidental, kahapon sang gab-i, Enero 5, 2026.
Ang pedestrian ang wala pa makilal-an, apang nagasuksok sang itum nga t-shirt, itom nga short, medium build kag ginabanta 5-foot-3 ang kataason kag ginalantaw nagaedad sang 35 tubtob 40 anyos.
Ginkilala naman ang driver sang truck nga si Placido Tibor Jr., 46 anyos, lalaki, kasado kag residente sang Brgy. Malingin, Bago City, Negros Occidental.
Sa inisyal nga imbestigasyon sang Talisay City Police Station ang truck ang nagabiyahe halin sa Silay City padulong sa Bacolod City sa outer lane, kun sa diin pagdangat sa lugar, aksidente sini nga nabungguan ang biktima nga nakaangkon sang samad sa ulo.
Gilayon man nga nagresponder ang personnel sang Talisay City Disaster Risk Reduction Management Office nga nagkumpirmar nga nadulaan na sang kabuhi ang biktima.
