Apisar nakarekord ang One Hospital Command Ceter sang Bacolod City Emergency Operations Center sang pinakanubo nga hospital capacity utilization rate sa ciudad sadtong Disyembre 4, punuan naman ang pedia unit sa tanan nga mga ospital sa karon.
Madumduman nga santo sa rekord sang EOC sang Disyembre 4, ang pito ka mga ospital ang nakareport sang kabug-usan nga 38.79 percent CUR.
Ang nasambit nga rate ang mas manubo sa narekord sang Disyembre 3 nga yara sa 45.23 percent.
Suno kay OHCC administrative officer Dr. Claire Capiral, 78 lamang nagikan sa 201 beds ang nagamit sang Disyembre 4 kun sa diin may nabilin pa nga 123 beds sarang magamit sang manugsulod nga mga pasyente.
Sa interview sang Bombo Radyo Bacolod kay City Administrator Em Legasp-Ang, ginpahayag sini nga nagpabutyag na ang mga pribado nga ospital sa ciudad lakip na ang Corazon Locsin Montelibano Memorial Regional Hospital nga indi sila anay magpangbaton sang mga pasyente nga kabataan bangud puno na gid ka tama ang ila mga pedia wards kag pedia rooms.
Gani, liwat nga nagpahanumdom si Ang sa mga ginikanan nga kun mahimo pa lang, indi na pagdal-on sa paglagaw ilabi na sa mga mall ang mga kabataan agud malikaw sila sa COVID transmission.
