Arestado ang peke nga dentista sa ginpatigayon nga entrapment operation sang National Bureau of Investigation (NBI)- Bacolod sa 24-B, Joven Street, Brgy 2, ciudad sang Victorias, Negros Occidental sang Miyerkules.
Sa interview sang Bombo Radyo Bacolod kay NBI-Bacolod Head Atty. Manuel Fayre Jr., ang peke nga dentista ang ginkilala nga si Regina Perez Manuel kag ini ang may clinic sa iya nga balay.
Suno diri, kumpleto man ini sa gamit kag naga-upod sa medical ukon dental mission indi lamang sa probinsya kag kun kaisa nagapadulong pa ini sa Manila.
Suno kay Fayre, ila ginkuha ang impormasyon angot sa peke nga dentista gikan sa Philippine Dental Association Incorporated Negros Occidental Chapter.
Pahayag sini, madamo pa sang dental practitioner sa probinsya nga wala sang lisenysa apang nagatrabaho sa gihapon.
Ginpaandaman na sini ang mga fake dentist nga magpangita na sang bag-o nga trabaho antes pa sila madakpan sang NBI.
Sa karun napasakaan na sang kaso nga pagbayolar sa Republic Act no. 9484 ukon Act to Regulate the Practice of Dentistry, Dental, Hygiene and Dental Technology in the Philippines ang peke nga dentista.
