Ginpaimbestigaran na karun sang Malacanang ang peke nga memo nga nagapahayag nga buhinan sang duha ka adlaw ang sweldo sang mga empleyado sang gobyerno kalakip diri ang miyembro sang Armed Forces of the Philippines (AFP) agud nga makatipon sang pondo para patigayunon nga relief operations sang gobyerno nga igahatag sa pungsod Turkiye nga tuman nga naapektuhan bangud sa mabaskog nga linog nga nagtay-og sa nasambit nga pungsod.
Ginpahayag ni Presidential Communications Office Secretary Cheloy Garafil nga nakig-angot na sa karun sa office of the Executive Secretary sa mga otoridad kaangot sa peke nga memo agud nga matumod kun sa diin kag sin-o ang ginhalin sang nasambit nga memo.
Ginpasiguro man ni Secretary Garafil nga manabat ang yara sa likod sini.
Ang nagalapta nga memo ang pirmado ini ni Executive Secretary Lucas Bersamin.
Samtang, padayon ang rescue operations sang Philippine Inter-Agency Contingent sa mga apektado sang 7.8 nga linog sa Turkey.
Suno sa pinakaulihi nga datos, nagdangat sa masobra 250 ka mga pasyente ang nabuligan sang Department of Health (DOH) humalin sang February 11 tubtob February 15,2023.
Nagpanghatag man ang Office of Civil Defense (OCD) sang relief items kaangay sang habol, bonnet, kag gloves agud nga makapahagan-hagan sang katugnaw nga ginabatyag sa nasambit nga pungsod.
Magluwas sa DOH kag OCD, ginhuman man ang 82-men sang Philippine rescue team nga ginbug-usan sang team nagikan sa Philippine Air Force, Philippine Army, Metro Manila Development Authority, kag Subic Bay Metropolitan Authority.
