Napamatud-an sang mag-asawa ang ka-delikado nga matuga sang motorcycle barrier sa mga naga-angkasanay.
Sa interview sang Bombo Radyo Bacolod kanday Leilani Siroy kag Ronald Dolar, lunsay mga Zumba instructors sa ciudad sang Bacolod, ginpahayag sang mga ini nga impractical kag wala gid sang pulos ang pagbutang sang barrier sa mga mag-asawa ukon live-in partners.
Suno kay Dolar, apisar ano pa kahinay sang padalagan sang motorsiklo kun may masugata naman nga dako nga salakyan kag madasig ang pagpadalagan sini, wala gid sang may mahimo ang mga motorcycle riders bangud sarang gid nga mapalid tuga sang barrier.
Ginpakigbahin sini ang ila nangin personal nga eksperyensya kun sa diin may yara sila nga nasugata nga isa ka 10-wheeler nga truck nga madasig ang padalagan.
Suno kay Dolar, gadugang lang gid sa risgo sang ila nga kabuhi ang barrier.
Magluwas diri, annoying man para sa iya ang barrier bangud nga nagapakdol-pakdol ini sa iya nga helmet tuga sang hangin.
Samtang, suno naman kay Siroy, bilang angkas sa motorsiklo, wala gid sini nakita ang purpose sang barrier ilabi na sa mag-asawa.
Suno sa iya, dugang lang sa gasto ang pagbutang sang barrier.
