Nagpatigayon sang sinapol sini nga adlaw ang Provincial Environment Management Office (PEMO) upod kay 3rd District Board Member Andrew Montelibano agud istoryahan ang pagpatigayon sang monitoring kag verification sa mga quarry sites kag suba sa probinsya ilabi na sa Northern Negros.
Nahibaluan nga plano karon ni Governor Eugenio Jose “Bong” Lacson nga magpatigayon sang review sa tanan nga quarry permits agud nga makakita sang solusyon sa nagaluntad nga pagbaha sa mga low-lying areas sang probinsya.
Sa interview sang Bombo Radyo Bacolod kay PEMO head Retired Judge Danilo Amisola, ginpahayag sini nga may yara sang kabug-usan nga 185 ka mga quarry site permit holders karon sa probinsya kun sa diin 37 diri ang makit-an sa 3rd District nga tuman ka apektado gid sang nagluntad nga pagbaha sang tinalikdan.
Gin-athag man ni Amisola nga may yara sila sang duha ka monitoring team sa probinsya agud nga magmonitor sa mga quarry sites.
Naga-establish man sila sang barangay monitoring team subong man sang municipal ukon city monitoring team.
Gin-athag naman sini nga nagabulig panubo sang pagbaha ang quarry bangud nga nagabulig ini padalom kag palapad sang suba.
Apang suno kay Amisola, kinahanglan na gid man nga I-dredge ang gibwangan sang mga suba bangud nga silted na ang mga ini.
