Ginklaro sang abogado nga may pangatubangon nga criminal charges ang mga nagapameke sang dokumento ukon pirma partikular na sa mga public documents.
Madumduman nga ginapanindugan ni San Carlos City Mayor Renato Gustilo nga falsified documents ang Kontrata, Notice to Award kag Notice to Proceed nga ginsumiter sang tatlo ka government contractors gikan sa Northern Luzon para sa accreditation sang business license.
Sa dokumento, nakabutang nga sila ang may natapos nga mga proyekto sa tatlo ka suba sa San Carlos City, apang sang gintsekyar, may ara sang matuod nga flood control projects apang lain ang project title, lain ang contractor kag lain ang cost sang project, apisar nga parehas lang ang natumod nga project location.
Sa interview sang Bombo Radyo Bacolod kay former Councilor Atty Renecito Novero, yara ang burden of proof kay Gustilo, agud pamatud-an nga ginpeke ang iya nga pirma sa mga dokumento sang tatlo ka ginatawag unscrupulous contractors.
Paathag sini nga ang forgery of signature ang criminal act santo sa revised penal code.
Ang penalty ang nakadepende sa type ukon purpose sang documents, kasubong man sa cost sang project.
Sila ang mahimo mapriso sang anom ka tuig kag isa ka adlaw tubtob 12 ka tuig, depende sa kabug-atun sang violation.
Paathag sang abogado nga mas malawig ang imprisonment para sa mga public official sangsa mga private individual, kag mahimo man nga magadepende ang kalawigon sa kadakuon sang balor sang proyekto.
Magluwas sa pagkapriso, mahimo man magdagdag sang fine ang korte.
Agud pamatud-an nga forged ang iya pirma, dapat nga matsekyar sang NBI calligraphic kag handwriting expert ang dokumento.
Samtang kun indi naman matumod kun sin-o ang nagpeke sang pirma, ang sunod nga mahimo lagson kag sarang mapasakaan sang kaso amo ang nakabenepisyo sa falsified documents.
Luwas sa Mayor, may mga engineers man nga nakapirma sa dokumento nga sarang man makasuhan apang suno kay Novero sarang nila nga idepensa nga wala sila nakahibalo nga forged ang pirma sang alkalde.
Samtang yara naman ang burden to explain sa tawo nga nagpalakat sang dokumento.
