Dako nga bugal ang pagkalakip sang imbensyon sang isa ka Negrense sa Research Project of the Year: STEM Shortlisted sang The Award Asia 2025.
Sa interview sang Bombo Radyo Bacolod kay Ceejay Faala, 3rd Year Bachlor of Secondary Education major in Science sang Carlos Hilado Memorial State University (CHMSU), wala gid ini nagdahom nga sa pagsend sini sang patent sang Pencroscope, isa ka Pen-sized digital microscope, ini ang ginpasakop sang ila research adviser sa The Award Asia 2025.
Nakibot na lamang ini sang ginpasa sa iya sang research adviser ang link, kun sa diin siya ang nakalista nga representante sang Pilipinas kompetisyon.
Sa karun, padayun pa sila sa research kag magapatigayon pa sang interviews agud mas mapamatud-an ang pagka-epektibo sang imbensyon partikular na sa mga estudyante.
Kasubong man ginahulat nila ang schedule nga ihatag sang The Award Asia 2025 sa petsa sang presentation.
Isa man sa karun nga ginatinguhaan pa nila nga ma-islan amo ang materials nga ginagamit, agud mahimo nga original, gani islan pa nila ang case nga highlighter nga anay gingamit sa inisyal nga produkto.
Sila ang magagamit sang 3D Printing agud mareplicate ang design kag indi magkaproblema sa patent.
Paathag ni Faala, nga siya mismo ang sa kolehiyo na nakagamit sang microscope, bangod sa kakulangan sang resources sang mga eskwelahan.
Gani ini ang iya napinsaran nga himuon nga gamay lamang agud mas mahapos para sa mga estudyante.
Aminado ini nga sang ginhimo ang imbensyon, ang yara lamang sa iya pinsar amo nga ini ang matapos na kag mapagwa sa merkado, apang wala sini ginalauman nga makabahin ang pencroscope sa The Award Asia 2025.
